Álftabyggð, Flúðum

Í hverfi Álftabyggðar á Flúðum er heilsársbústaður í eigu FVFÍ.  Hann er 60 fermetrar, þrjú svefnherbergi, stofa, eldhús og bað. Svefnpláss fyrir 8 manns. Stór útiverönd er ásamt heitum potti, garðhúsgögnum og gasgrilli. Þetta er glæsilegur bústaður, búinn öllum nútímaþægindum.  Í eldhúsi er fullkomin eldavél, örbygjuofn og önnur helstu rafmagnstæki. Leiktæki eru á lóðinni. Stutt er í ýmsa afþreyingu, t.d. er fullbúinn 18 holu golfvöllur rétt hjá bústaðnum. Garðyrkjubændur selja afurðir sínar víðsvegar á svæðinu og á Flúðum er sundlaug, hótel, matvöruverslun, nokkrir veitingastaðir og banki. Skemmtileg dagsferð er t.d. á Gullfoss og Geysi, stutt í Friðheima og hálftíma aksturí Laugarás og Skálholt.  Leiðbeiningar frá Flúðum. Keyrt sömu leið og að Flúða golfvellinum. Yfir brúnna eftir Skeiða- og Hrunamannavegi og þegar kemur að hringtorginu taka þá Hvítárholts afleggjarann. Bústaðurinn er þá sýnilegur fljótlega til hægri og er beygjan inn að honum merkt Álftabyggð.

Kiðárskógur 4 Húsafelli

Húsið er 70 fm auk 20 fm svefnlofts. Gistiaðstaða er fyrir 10-12 manns. Við húsið er rúmgóð verönd með gasgrilli, garðhúsgögnum og heitum potti. Stofan er vel búin húsmunum og er með DVD og sjónvarpi. Á neðri hæð eru tvö svefnherbergi, annað með hjónarúmi og ferðarúmi fyrir ungabörn en hitt með koju og rúmi. Á svefnlofti eru 2 rúm og 4 dýnur. Í eldhúsi eru öll algeng eldhúsáhöld og rafmagnstæki s.s. eldavél, ofn, örbylgjuofn, ísskápur, kaffivél og Nespresso kaffivél, samlokugrill, blandari, vöfflujárn, þeytari og brauðrist. Barnastóll er til staðar. Salerni er með sturtuaðstöðu. Í skáp milli eldhúss og baðherbergis er þvottavél.  Húsið er á fallegum stað í miðjum Húsafellsskóginum og stendur við Kiðárskóga 4. Margir áhugaverðir staðir eru í nágrenninu og öll helsta þjónusta t.d. þjónustumiðstöð, sundlaug, verslun, veitingastaður og hótel. Hægt er að fara í golf, Giljaböð, skoða hina þekktu hella Víðgemli og Surtshelli, veiða í Norðlingafljóti, velja á milli fjölda gönguleiða auk skipulagðra ferða á Langjökul.

Hyrnuland 3, Akureyri

Hyrnuland 3 er 116 fm orlofshús á Akureyri með svefnpláss fyrir 6. Þrjú svefnherbergi , tvíbreið rúm eru í endaherbergjum og tvískipt í miðju herbergi. Tvö baðherbergi eru í húsinu með sturtu og gengið út í heitan pott á verönd úr stærra baðherbergi. Geymsla er áföst húsinu þar sem er þvottavél og þurrkari ásamt rými fyrir skíðabúnað ofl. Loftræstikerfi er í húsinu . Húsið er vel búið og staðsett í neðri Hálöndum í Hlíðarfjalli með fallegu útsýni út á Eyjaförð. Nespresso kaffivél er á staðnum.

Holtaland 11, Akureyri

Holtaland er um 100 fm orlofshús á Akureyri með þremur svefnherbergi og gistimöguleika fyrir 8 manns.  Tvö baðherbergi eru í húsinu, annað með baðaðstöðu sem tengist pottrými en hitt deilir rými með þvottaherbergi. Í þvottarými er hægt að stilla loftræstikerfi og er mælt með að það sé notað þegar mikil notkun er t.d. á heitum potti og baðherbergi til að koma í veg fyrir rakamyndun. Heitur pottur er inni í húsinu með beinu aðgengi út á suðurverönd. Stór geymsla með sérinngangi er í húsinu en þar hægt að  þurrk ýmsan viðlegubúnað. Húsið er vel búið og staðsett í efri Hálöndum í Hlíðarfjalli með fallegu útsýni út á Eyjaförð. Nespresso kaffivél er á staðnum.

Klifatangi Suðursveit, Hús nr. 2

Í Suðursveit í Austur Skaftafellssýslu eru tveir bústaðir. Leigutími er yfir sumartímann, þ.e. frá því í byrjun júní fram í september. Húsin eru notaleg, en aðeins komin til ára sinna. Svefnherbergi eru tvö. Þau eru ágætlega búin húsgögnum og öðrum búnaði. Geta 6-8 manns gist í einu í hvoru húsinu um sig.Umhverfið er mjög fallegt og stutt í margar skemmtilegar gönguleiðir. Húsin eru staðsett í u.þ.b. 60 km. fjarlægð frá Höfn í Hornafirði. Ágætis veiðivötn eru í Smyrlabjargarfjalli og eru veiðileyfi seld á bæ á leið til fjallsins. Merking er við veginn. Fluglalíf er mjög fjölskrúðugt í Suðursveit. Næsta sundlaug er í Öræfum 15-20 mín. akstur að Jökulsárlóni. Verslun er að Fagurhólsmýri en þangað er um 50 km. akstur. Hér má sjá staðsetningu bústaðanna á korti.